4 Minutes To Read

အွန်လိုင်းလောကတွင် ပဲ့ကိုင်မောင်းနှင်ခြင်း။ ။ မြန်မာအမျိုးသမီးအနုပညာရှင်များ၏ ဒစ်ဂျစ်တယ်ခရီး

4 Minutes To Read
  • English
  • ဗမာစာ
  • နိုင်ငံရေးအုံ့ကြွမှုကာလတွင်း မြန်မာအမျိုးသမီးအနုပညာရှင်များ၏ အခန်းကဏ္ဍကို Shalini Perumal မှ စူးစမ်းဖော်ထုတ် ‌ရေးသားထားသည်။

    Credit: David Stanley

    ဒစ်ဂျစ်တယ်ခေတ်သည် အနုပညာရှင်များနှင့် ၎င်းတို့၏ ပရိသတ်အကြား ဆက်သွယ်မှုပုံစံနှင့် အနုပညာရှင်များ၏ ဖန်တီးမှုလက်ရာကို ‌ဖော်ပြသည့်ပုံစံများကို တော်လှန်ပြောင်းလဲခဲ့သည်။ မြန်မာပြည်တွင် အွန်လိုင်းလောက သည် အနုပညာရှင်များအတွက် အထူးသဖြင့် အမျိုးသမီးအနုပညာရှင်များအတွက် ၎င်းတို့၏ ဖန်းတီးမှုကို ခြယ်မှုန်းစရာ စိတ်လှုပ်ရှားဖွယ် ပိတ်ကားတစ်ချပ် ဖြစ်လာသည်။  အွန်လိုင်းကမ္ဘာကြီးသည် အမျိုးသမီးအနုပညာရှင် များအတွက် ကိုယ်ပိုင် အမြင်ဖော်ထုတ်ရန်၊ ပူးပေါင်းဆောင်ရွက်ရန် နှင့် ပြည်တွင်း၊ ပြည်ပ ပရိတ်သတ်များနှင့် ထိတွေ့ဆက်ဆံရန် အတွက် အလွန်စွမ်းအားကြီးသော ပလက်ဖောင်း တစ်ခုပေးခဲ့သည်။ အဆိုပါ ဒစ်ဂျစ်တယ်တော်လှန်ရေးသည် ၎င်းတို့၏ အနုပညာအလုပ်များကို ကမ္ဘာသိဖြစ်စေရုံသာမက ပထဝီနယ်နမိတ်များကို ကျော်လွန်၍ ၎င်းတို့၏ဇာတ်လမ်းများကို မျှဝေရန်၊ လူမှုနှုန်းစံများကို စိန်ခေါ်ရန် အားအင်ပေးခဲ့သည်။ သို့သော်လည်း အဆိုပါအခင်းကျင်းသည် ၂၀၂၁ ခုနှစ် ဖေဖော်ဝါရီလ  အပြီးတွင် တမဟုတ်ချင်း ပြောင်းလဲခဲ့ပြီး၊ ဒစ်ဂျစ်တယ် ပလက်ဖောင်းများပေါ်ရှိ  အမျိုးသမီး အနုပညာ ရှင်တို့၏ လုပ်ကိုင်နိုင်စွမ်း (အေဂျင်စီ)လားရာ ကို ပြောင်းလဲစေခဲ့သည်။ ယခု သုံးသပ်ချက်သည် အာဏာသိမ်းပြီးနှင့် အာဏာ မသိမ်းခင် ကာလတွင် မြန်မာအမျိုးသမီး အနုပညာရှင်များ၏ အွန်လိုင်းတွင် ဖြစ်တည် တည်ရှိမှု  ဆင့်ကဲပြောင်းလဲလာပုံ ကို ဆန်းစစ်၍ ၎င်းတို့၏ အတွေ့ကြုံများကို လေ့လာသုံးသပ်ထားသည်။

    အာဏာမသိမ်းမီ ‘ဒီမိုကရေစီအသွင်ကူးပြောင်းရေးဖြစ်စဥ်’ ဆယ်စုနှစ် ကာလတွင်း မြန်မာပြည်အနုပညာမြင်ကွင်းအား ဖော်ထုတ်နိုင်စွမ်း၊ ဖန်တီးနိုင်စွမ်းသော ကာလဟု ဆိုနိုင်ပါသည်။ စစ်အုပ်ချုပ်ရေးဆယ်စုနှစ်ပေါင်းများစွာအပြီး ရောက်ရှိ လာသော အဆိုပါကာလတွင်း ဒစ်ဂျစ်တယ်ရပ်ဝန်းသည် အမျိုးသမီးအနုပညာရှင်များအား ၎င်းတို့ အနုပညာများ မျှဝေရန်၊ အမြင်များကို ထုတ်ဖော်ပြောဆိုရန်နှင့် ကမ္ဘာ့ပရိသတ်များနှင့် ဆက်သွယ်ရန်အတွက် ကျောက်ချရာ နေရာ တစ်ခု ပေးခဲ့သည်။  လူမှုမီဒီယာ ပလက်ဖောင်းများ၊ အနုပညာမျှဝေသည့် ပုဂ္ဂလိက ဝဘ်ဆိုဒ်များ နှင့် အွန်လိုင်း ပြခန်း များသည် အမျိုးသမီး အနုပညာရှင်များ၏  ဖန်တီးနိုင်စွမ်းကို ပထဝီနယ်နမိတ်ကျော်လွန်ပြသနိုင်သော အရေးကြီး နေရာများ ဖြစ်လာသည်။ အာဏာမသိမ်းမီက ဖေ့စ်ဘွတ်ခ် လူမှုစာမျက်နှာ (Facebook) ၊ အင်စတာဂရမ် (Instagram) နှင့် တွစ်တာ (Twitter) ကဲ့သို့ သော လူမှုကွန်ယက် ပလက်ဖောင်းများသည် အမျိုးသမီးအနုပညာရှင်များကို ၎င်းတို့ အနုပညာ လက်ရာများကို ပြသရန်၊ ပရိသတ်များနှင့် ထိတွေ့ဆက်ဆံရန် နှင့် ကမ္ဘာ့အနုပညာရှင်အသိုင်းဝန်းနှင့် ဆက်သွယ်ပြောဆို ရန် အထောက်ကူဖြစ်စေခဲ့သည်။ ဂီတပညာရှင် တစ်ဦးလည်း ဖြစ်သော Pinky Htut (Pinky†u† 🌙 (@pinkyhtut) • Instagram photos and videos) ကဲ့သို့   အနုပညာရှင်များသည် ဒီမိုကရေစီအသွင်ကူးပြောင်းရေး စတင်သည့် မြန်မာနှင့် ပြင်ပကမ္ဘာတို့ တံခါးဖွင့် ကူးလူးချိတ်ဆက်သော ကာလတွင် ကြီးပြင်းလာသော မျိုးဆက်ဖြစ်သည်။  

    ပုံရိပ်ယောင်ရပ်ဝန်းများသည် ပညာရှင်ဖန်တီးသော ပြခန်းများနှင့် သဘောသဘာဝ ဆင်တူပြီး ခံစားကြည့်ရှုသူ ဧည့်သည် များကို  အရောင်၊ ပုံသဏ္ဍာန် နှင့် စိတ်ခံစားချက်များ စသည် အနုပညာရှင်များ၏ ကမ္ဘာထဲသို့  ရောက်ရှိခံစားနေရ သကဲ့သို့ အတွေ့ကြုံပေးသည်။ တောက်ပသည့် မြင်ကွင်းပုံများ၊ စဥ်းစားတွေးခေါ်မှုပေးသည် ဇာတ်လမ်းများနှင့် ပုံရိပ်ယောင် ပြခန်းများမှ တဆင့် မြန်မာအမျိုးသမီးအနုပညာရှင်များမှာ ၎င်းတို့၏အသံကို အသိမှတ်ပြုမှုပုံစံအသစ်ကို ရှာတွေ့ခဲ့ ကြသည်။ နှစ် ၅၀ ကြာ ရက်စက်ကြမ်းကြုတ်သည့် စစ်အုပ်ချုပ်ရေးတွင် အသေချာ စောင့်ကြည့်ခံရ၊ ဆင်ဆာ ဖြတ်တောက်ခံရ၊ ဖော်ပြခွင့်မရခဲ့သော ယဥ်ကျေးမှုဆိုင်ရာ ဇာတ်ကြောင်းများ ၊ ကိုယ်ပိုင်အမှတ်သညာ လက္ခဏာများ နှင့် လူ့အဖွဲ့စည်းတွင်းမှ ပြဿနာများကို ၎င်းတို့မှတဆင့် မျှဝေနိုင်ခဲ့သည်။ ဒစ်ဂျစ်တယ်လောကသည် အနုပညာရှင်များကို ၎င်းတို့၏ ထူးခြားသော ယဥ်ကျေးမှု၊  လူမျိုးစု ကိုယ်ပိုင်အမှတ်သညာ လက္ခဏာများ များနှင့် ဆက်သွယ်ပြောဆိုနိုင် စေခဲ့ပြီး မြန်မာ့ကြွယ်ဝသော ယဥ်ကျေးမှုအမွေအနှစ်ကို တန်ဖိုးထားစေခဲ့သည်။ ဖေ‌ဖော်ဝါရီ ၂၀၂၁ အာဏာသိမ်းမှု မတိုင်ခင် ဆယ်နှစ်တိုင်ကာလအတွင်း မြန်မာပြည်တွင် အထူးသဖြင့် ရန်ကုန်နှင့် မန္တလေးကဲ့သို့သော မြို့ပြများတွင် လှုပ်ရှားအသက်ဝင်နေသော အနုပညာမြင်ကွင်းမျိုးရှိခဲ့သည်။ (အင်တာနက် ပိုမို လွတ်လပ်ခွင့်ရှိသော အခြေအရ ထွက်ပေါ်လာသည့်) ရုပ်တု၊ ရုပ်သေး၊ ဓါတ်ပုံ နှင့် ဒစ်ဂျစ်တယ် အနုပညာများ က မြန်မာအမျိုးသမီးများ၏ အနုပညာကို ပွင့်လန်းစေခဲ့သည်။  အမျိုးသမီးများစွာအပါအဝင် အနုပညာရှင် ၇၅ ဦးကျော်နှင့် ၎င်းတို့ ၏ လက်ရာများကို မီးမောင်း ထိုးပြထားသော မြန်မာ့အသွင်ကူးပြောင်းမှုကို ခြယ်မှုန်းခြင်း စာအုပ်သည် အနုပညာကို ပွင့်လန်းစေသည့်  အထူးသဖြင့် တွန်းလှန်ခုခံသည့်အနုပညာ အသွင်ဖြင့် ပွင့်လန်းစေသည့် ဒီမိုကရေစီ၏ စွမ်းအားကို ဖော်ပြထားသည်။  အွန်လိုင်းရပ်ဝန်း များသည် မြို့ပြများတွင်  ကြီးထွားလျက်ရှိသော အနုပညာမြင်ကွင်းများကို ပို၍သာ ပရိသတ် တိုးစေသည်။ ဥပမာ ၂၀၂၀ ခုနှစ် ဧပြီလတွင် ပြုလုပ်ခဲ့သော ““Art-Spaces”-Us” သည် အောင်မြင်သော အွန်လိုင်း ပြပွဲတစ်ခုဖြစ်ပြီး ပြပွဲတွင် ပါဝင်ခဲ့သည့် အမျိုးသမီးအနုပညာရှင်များအတွက်  ရှုထောင့်စုံပါဝင်သော ဇာတ်လမ်းတစ်ခု ပြောပြနိုင်သည့် လွတ်လပ် သော စုပေါင်းရပ်ဝန်း တစ်ခု ဖန်တီးပေးခဲ့သည်။ ထိုရပ်ဝန်းက အမျိုးသမီးအနုပညာရှင်များကို ဂျန်ဒါ (ကျား-ဖြစ်ခြင်း မ-ဖြစ်ခြင်း ဆိုင်ရာ လူမှုသတ်မှတ်ချက်) နှုန်းစံများ ကို စိန်ခေါ်စေခဲ့ပြီး ထိုကာလအတွင်း အမြင်အယူဆများပြောင်းစေရန် အကျိုးပြုနိုင်ခဲ့သည်။

    အမျိုးသမီးအနုပညာရှင်များသည်  ယဥ်ကျေးမှုစုံ အပြန်လှန်ဆက်သွယ်မှု ဒိုင်ယာလော့ များကို ဖန်တီးရန် မြန်မာနှင့် နိုင်ငံတကာ အနုပညာရှင်များ လက်တွဲလုပ်ဆောင်နိုင်သည့် အစပျိုးချက်များတွင် ဆက်သွယ်ချိတ်ဆက်နိုင်ရန် အွန်လိုင်း ကွန်ယက်များ၏ စွမ်းအားကို အသုံးပြုခဲ့သည်။ ထို့အပြင် အမျိုးသမီးအနုပညာရှင် အများစုမှာ ကျား-မ တန်းတူ ညီမျှရေး၊ လူ့အခွင့်ရေး နှင့် သဘာဝပတ်ဝန်းကျင်ဆိုင်ရာ ပြဿနာများကို ဖြေရှင်းရန် လူမှုရေးနှင့် နိုင်ငံရေး အပြောင်းလဲ များကို အရေးဆိုလှုံ့ဆော်ရန် ၎င်းတို့၏ အွန်လိုင်းပလက်ဖောင်းများကို အသုံးပြုခဲ့ကြသည်။ အာဏာသိမ်းမှုမတိုင်ခင် ဆယ်နှစ်အတွင်း ပိုမိုလွတ်လပ်မှုနှင့်အတူ အမျိုးသမီးအနုပညာရှင်များ၏ ဇွဲကြီးညီညွတ်မှုပြသသော အနုပညာမျိုးသည် ပို၍တွင်ကျယ်လာသည်။ Jacqueline Adams က နိုင်ငံတော်၏အကြမ်းဖက်မှုနှင့် စီးပွားရေးအကြပ်တည်းများ ကို တွေ့ကြုံခံစားရသည့် တစ်ဦးတစ်ယောက်ချင်းက ဖန်တီးထားသော အနုပညာလက်ရာများကို  အခြားသူများက ဖြန့်ဝေ၊ ရောင်းချ၊ ဝယ်ယူ၍ အနုပညာရှင်များနှင့် အတူ ရပ်တည်မှုကို ဖော်ပြခြင်း၊ ငွေကြေးထောက်ပံ့ ခြင်းကို ညီညွတ်မှုပြ အနုပညာဟု ဖွင့်ဆိုထားသည်။ (စာအုပ်။ “ညီညွတ်မှုပြအနုပညာ” 8 What Is Solidarity Art? (degruyter.com) အဆိုပါခေါင်းစဥ်ကို ဆန်းစစ်ထားသည့် ဆောင်းပါး တစ်ခုတွင် မြန်မာအနုပညာရှင်အမျိုးသမီးများသည် အနုပညာလက်ရာများ ကို ဖန်တီးထုတ်လုပ်လေ့ ရှိသည်၊ “ထို့နောက်တွင် ၎င်းတို့၏ လက်ရာများကို ဒစ်ဂျစ်တယ် အသွင်ပြောင်းက နိုင်ငံရပ်ခြားသို့ ပို့သည်၊ နိုင်ငံရပ်ခြားတွင် ပရင့်ထုတ်သည်၊ ချိတ်ဆွဲသည်၊ ပြသပြီး ရောင်းသည်၊ ရောင်းချရငွေများကို အဆိုပါလက်ရာများထုတ်လုပ်သည့် အနုပညာရှင်များထံသို့ ပြန်ပို့သည်၊ အနုပညာရှင် အများစုမှာ မြန်မာပြည်တွင် နေထိုင်ကြသည်”၊ အီလက်ထရောနစ်စီးပွားရေး အစပျိုးချက်များက အမျိုးသမီး အနုပညာရှင်များ၏ အလုပ်များကို တိုးတက်စေသည် ဟု ဖော်ပြထားသည်။

    ၂၀၂၁ ခုနှစ် ဖေဖော်ဝါရီတွင် အာဏာသိမ်းမှု စတင်ခဲ့ပြီးနောက် အမျိုးသမီးအနုပညာရှင်များသည် အာဏာသိမ်းမှုကို ဆန့်ကျင်သော အနုပညာပုံသဏ္ဍာန် အမျိုးမျိုးဖြင့်လည်းကောင်း၊ #WhatsHappeningInMyanmar ဟရှ်တဂ် သုံး၍ တကမ္ဘာလုံး နှင့် မျှဝေခဲ့သော မကျေနပ်မှုကို ထုတ်ဖော်သည့် ရုပ်ရှင်များ၊ ပန်းချီကားများ၊ သေချာစွာ မှတ်တမ်းတင်ထား သော တော်လှန်ပိုစတာများ၊ အကများနှင့် များစွာသော အနုပညာဆန်ဆန်ဆန္ဒပြမှုများကို မှတ်တမ်းတင်ခြင်းဖြင့် လည်းကောင်း အလွန်အရေးကြီးသော အခန်းကဏ္ဍမှ ပါဝင်ခဲ့သည်။ ကျယ်ပြန့်လာသော တော်လှန်ရေးလှုပ်ရှားမှု များကြောင့် စစ်အစိုးရမှ အင်တာနက်အသုံးပြုခွင့်အား ကန့်သတ်လိုက်သည့်အခါ အာဏာသိမ်း ဆန့်ကျင်လှုပ်ရှားမှုရှိ အနုပညာမြင်ကွင်းပေါ် သက်ရောက်မှုရှိခဲ့သည်။ ဥပမာ ရန်ကုန်မှ ပထမဆုံး အမျိုးသမီး ဂရက်ဖတီ (နံရံပန်းချီ) ရေးဆွဲသူ အနုပညာရှင်ဖြစ်သူ Ku Kue သည် စစ်တပ်ကို တိုက်ရိုက် ရည်ညွှန်းသည့် နိုင်ငံရေးအနုပညာကို ဖန်တီးခဲ့သည်။ “မျိုးဆက်မှားပြီး ပြဿနာရှာမိပြီ” ဟု ရေးထားသော ဆိုင်းဘုတ်ကို လူငယ်တစ်ဦး ကိုင်ဆောင်ထားသည့် သူမ၏ ပုံဖော်ချက်မှာ အင်တာနက်တွင် ပြန့်နှံ့ခဲ့ပြီး  ဒီမိုကရေစီအရသာကို ပြန်လည်လုယူခံရဖို့သာ ခံစားခဲ့ရသော လူငယ်များ၏ ဒေါသကို ပြသခဲ့သည်။ သူမ၏ အနုပညာကို @girlpowerinmyanmar နှင့် သူမ သရုပ်ဖော်ပုံများရေးဆွဲသည့် နှစ်ဘာသာ ဖြင့် ဖော်ပြသော ကလေးစာအုပ်များ အပါအဝင် အမျိုးမျိုးသော အင်စတာဂရမ် စာမျက်နှာများ တွင် ပြသခဲ့သည်။

    ပင်ရင်း ။ ။ မြန်မာ/အနုပညာ၊ မြန်မာ။

    Chuu Wai Nyein ကဲ့သို့သော အခြားအနုပညာရှင်များသည်  “အနှောက်ယှက်ပေးမှုနှင့် အနိုင်ကျင့်မှုများကို ခံစားရှင်သန်ခဲ့ ရသော လူ့အဖွဲ့စည်းမှ မြန်မာအမျိုးသမီးများကို အားအင်ပေးရန်နှင့် စိတ်အားတက်ကြွစေရန် အနုပညာများကို ဖန်တီး ခဲ့သည်။ အာဏာသိမ်းမှုဖြစ်သောအခါ Chuu သည် လူထုခုခံလှုပ်ရှားမှု ကနဦးနေ့ရက်များတွင် ပါဝင်အကျိုးပြုရန် သူမ၏ လူမှုမျှတမှုတန်ဖိုးများ နှင့် အနုပညာအရည်အသွေး ကို ပေါင်းစပ်အသုံးချမည် ဆိုသည်မှာ အံ့ဖွယ်မဟုတ်‌‌ပေ” (Insight Myanmar, 2022: A Portrait of the Artist, After the Coup — Insight Myanmar)။  သူမ၏ ခုခံတော်လှန်အနုပညာများကို ဖော်ထုတ်ပြသရန် သူမတွင် ကိုယ်ပိုင် ဝဘ်ဆိုဒ် လည်း ရှိသည်။

    ပင်ရင်း။ ။ A Portrait of the Artist, After the Coup — Insight Myanmar

    အာဏာသိမ်းပြီးနောက် နိုင်ငံရေးကသောင်းကနင်း ဖြစ်မှုများက အင်တာနက်အသုံးပြုခွင့်ပေါ် ကန့်သတ်ချက်များ ၊ လူမှု မီဒီယာများပေါ် ဆင်ဆာဖြတ်တောက်မှု နှင့် ပုဂ္ဂလိက လုံခြုံရေးပေါ် စိုးရိမ်ချက်များ ဖြစ်စေသည့်နောက်တွင် အွန်လိုင်း အခင်းကျင်းသည့် စိန်ခေါ်မှုများပြည့်နှက်နေသည့် ရပ်ဝန်းအဖြစ်သို့ ပြောင်းလဲသွားသည်။ အဆိုပါ အတားဆီးများ ရှိသော်လည်း အမျိုးသမီးအနုပညာရှင်များမှာ ၎င်းတို့၏ အွန်လိုင်းပေါ် တည်ရှိမှုကို ပြောင်းလဲလာသည့် ပတ်ဝန်းကျင်နှင့် အညီ ပဲ့ကိုင်လှုပ်ရှားပြီး အလွန်ပြောင်မြောက်သော ကြံ့ကြံ့ခံမှုကို ပြသခဲ့ကြသည်။ အာဏာသိမ်းပြီးနောက် အမျိုးသမီးအနုပညာရှင်များ၏ ဒစ်ဂျစ်တယ်အေဂျင်စီတွင် အင်တာနက် ကန့်သတ်ချက် များအကြားတွင် ၎င်းတို့၏ မကျေနပ်မှုများနှင့် ရည်ရွယ်ချက်များကို ဥပမာစကားပုံများ၊ သင်္ကေတများ ဖြင့် ဆက်သွယ်ပြောဆိုသော သိမ်မွေ့သော ခုံခံမှုပါဝင်သည်။ အနုပညာရှင်များစွာသည် မြန်မာပြည်တွင်းမှ အခြေနေများကို ကမ္ဘာသိဖြစ်စေရန် အွန်လိုင်း ပလက်ဖောင်းများ ဘက်သို့လှည့်လာပြီး နိုင်ငံတကာအသိုင်းဝိုင်း၏ ဝန်းရံမှု နှင့် ညီညွတ်မှုကို ရှာဖွေလာသည်။ ရိုးရာအကျင့်ကြံများ၊ ဒဏ္ဍာရီနှင့် ပုံပြင်များကို မျှဝေရန် အွန်လိုင်း ရပ်ဝန်းကို  အသုံးချခြင်းအားဖြင့်  ဒစ်ဂျစ်တယ် လောကသည် မြန်မာ့ ယဥ်ကျေးမှု အမွေနှစ်များကို ထိန်းသိမ်းရန် စောင့်ရှောက်ရာ နေရာတစ်ခုလည်း ဖြစ်လာသည်။

    မြန်မာအမျိုးသမီးအနုပညာရှင်များ၏ အွန်လိုင်းတွင် တည်ရှိမှုမှာ စိန်ခေါ်မှုများကို ခံစားရှင်သန်လျက်ရှိသလို ဆိုးရွား သော အကျိုးဆက်များကို ကျော်လွှားရန် ၎င်းတို့၏ မတုန်လှုပ်သောဇွဲမာန်ကို သက်သေခံမှုလည်း ဖြစ်သည်။ ၎င်းတို့၏ ကြံ့ကြံ့ခံမှုက  အသံများကိုဖော်ထုတ်ပေးရာ၊ လုပ်ဆောင်ချက်များကို စိတ်ခွန်အားပေးရာ၊ ယဥ်ကျေးမှု ဇာတ်ကြောင်းများ ကို ထိန်းသိမ်းရာတွင် ဒစ်ဂျစ်တယ်ပလက်ဖောင်းများ၏ အသွင်ကူးပြောင်းနိုင်သော အလားလာကိုပြသသည်။ နိုင်ငံရေး အခင်းကျင်း ဆင့်ကဲပြောင်းလဲ လာသည်နှင့် အမျှ အကန့်သတ်များရှိစေကာမူ ဒစ်ဂျစ်တယ်လောကသည် ချိတ်ဆက်မှု များ အားကောင်းရန်၊ အပြောင်းလဲကို အရေးဆို လှုံဆော်ရန် နှင့် အမျိုးသမီးအနုပညာရှင်များ၏ အေဂျင်စီကို ပြန်လည်ရယူရန် အတွက် မျှော်လင့်ချက် အလင်းရောင်ဖြစ်လာသည်။

    မြို့ပြများတွင် အနုပညာရုံများ ပိတ်သွားခြင်း၊ Pinky ကဲ့သို့သော အနုပညာရှင်များကို ဖမ်းဆီးအရေးယူခံရခြင်း (Pinky သည် ၂၀၂၁ ခုနှစ် နွေဦးတွင် အဖွဲ့ဝင်တစ်ဦး လက်ပ်တော့ ကွန်ပျူတာ နှင့်အတူ အဖမ်းခံရပြီး နောက်တွင် မြန်မာနိုင်ငံမှ ထွက်ခွာခဲ့သည်) များက အမျိုးသမီးအနုပညာရှင်များနှင့် ခုခံတော်လှန်မှု တစ်ခုလုံးအတွက် အွန်လိုင်းရပ်ဝန်းသည် ပို၍ ပင် အရေးကြီးလာစေခဲ့သည်။ မြန်မာအမျိုးသမီးအနုပညာရှင်များ၏ အွန်လိုင်းခရီးကိုပြောလျှင် အားအင်ရှိမှုနှင့် ကြံ့ကြံ့ခံမှု ဇာတ်လမ်းတစ်ခုဖြစ်သည်။ အာဏာမသိမ်းမီ ဖန်တီးဖော်ပြနိုင်သည့် ကာလမှ ပေါ်ထွက်လာပြီး  အာဏာသိမ်း ပြီးနောက် အရှိတရားဖြစ်သည့် စိန်ခေါ်မှုများကို လိုက်လျောညီထွေပြောင်းလဲရသည့် ကာလအထိ အဆိုပါ အနုပညာရှင် များသည် ဒစ်ဂျစ်တယ် ပလက်ဖောင်းများ၏ စွမ်းအားကို ချိတ်ဆက်ရေး၊ အရေးဆိုလှုံဆော်ရေး နှင့် ယဥ်ကျေးမှု ထိန်းသိမ်းရေးများအတွက် ကရိယာအဖြစ် ဖော်ထုတ်ခဲ့သည်။ ရုပ်ပုံကားချပ်များ (pixels) နှင့် စိတ်ဆန္ဒ (passions)  တွေ့ကြသည့် ကမ္ဘာကြီးတွင် မြန်မာမှ အမျိုးသမီးအနုပညာရှင်များမှာ ကြံ့ကြံ့ခံမှု၊ ကိုယ်ပိုင်အမှတ်သညာလက္ခဏာနှင့် အရေးဆိုလှုံ့ဆော်မှု ပြကွက်များကို ကြီးမားကျယ်ပြန့်သော ဒစ်ဂျစ်တယ် ကားချပ်ပေါ် တွင် ဆေး‌ရောင်ခြယ်မှုန်းလျက် ရှိသည်။ ဖန်သားပြင်များကို ကျော်လွန်သည့် ဖန်တီးမှုနှင့် ဇာတ်လမ်းများမှ တဆင့် အမျိုးသမီးအနုပညာရှင် များသည် အနုပညာအခင်းကျင်းကို ပြန်လည်သတ်မှတ်ပုံဖော်နေကြပြီး ပုံရိပ်ယောင် နှင့် ရုပ်ဝတ္တုလောက နှစ်ခုလုံးတွင် ဖျက်မရ မည့် အမှတ်သားများ ချန်ထားရစ်နေကြသည်။ ၎င်းတို့၏ ပုံပြင်သည် ဆိုးရွားသည့်အကျိုးဆက်များကို တွန်းလှန်ခုခံ ရန်၊ ညီညွတ်မှုကို မြှင့်တင်ရန်၊ ဇာတ်လမ်းများကို ပုံသွင်းရန်အတွက် အနုပညာနှင့် ဒစ်ဂျစ်တယ် အေဂျင်စီ တို့ မည်မျှ သက်ရောက်မှု ရှိသည်ကို သတိပြုမိစေသည်။

    အချုပ်အားဖြင့်ဆိုရလျှင် နည်းပညာ ၊ ဒစ်ဂျစ်တယ်ရပ်ဝန်းအတွင်း ဂျန်ဒါအပြောင်းအလဲ နှင့် အနုပညာ၊ ကိုယ်ပိုင်အမှတ် သညာ လက္ခဏာ နှင့် အွန်လိုင်းပလက်ဖောင်းများအကြား အပြန်လှန် သက်ရောက်မှု တို့မှာ ဆင့်ကဲပြောင်းလဲနေကြ သည်။ ယခုဆောင်းပါးသည် ၂၀၂၁ ခုနှစ် ဖေဖော်ဝါရီ အာဏာသိမ်းမှု နောက်ခံ ဒစ်ဂျစ်တယ်အခင်းကျင်းကို ပဲ့ကိုင် မောင်းနှင်လျက်ရှိသည်နှင့် တပြိုင်နက် အမျိုးသမီး အနုပညာရှင်များ တွေ့ကြုံရသော စိန်ခေါ်မှုများ၊ အခွင့်လမ်းများ နှင့် သိမ်မွေ့သောကွဲပြားမှုများကို ဖော်ပြထားသည်။

    Shalini Perumal သည် ဖန်တီးမှုနှင့်နိုင်ငံတကာဖွံ့ဖြိုးမှုဆိုင်ရာ ကျွမ်းကျင်ပုဂ္ဂိုလ်တစ်ဦးဖြစ်ပြီး ထိုင်းနိုင်ငံရောက် ကရင်နှင့် ဗမာ ရွှေ့ပြောင်းဒုက္ခသည်များအတွက် ဝန်ဆောင်မှုပေးသည့် ထိုင်းနိုင်ငံ မဲဆောက်ရှိ မဲတော်ဆေးခန်းတွင် အလုပ်လုပ်ခဲ့ဖူးသည်။ သူမသည် လက်ရှိတွင် နယူးဒေလီရှိ ActionAid India တွင် ဆက်သွယ်ရေးအရာရှိ အဖြစ် ဆောင်ရွက်နေသည်။ ဆောင်းပါးတွင် ပါဝင်သော အမြင်များမှာ သူမ၏ အမြင်အာဘော်သာဖြစ်ပြီး အဖွဲ့စည်း၏ အမြင်အာဘော်မဟုတ်ပါ။

    (X: @perumal_shalini and Instagram @shalini.sri.perumal)

    Related Articles
  • English
  • ဗမာစာ
  • English
  • ဗမာစာ
  • English
  • ဗမာစာ
  • English
  • ဗမာစာ
  • English
  • ဗမာစာ
  • English
  • ဗမာစာ
  • Stay in the loop.

    Subscribe with your email to receive the latest updates from Tea Circle.