လူငယ်ခေတ် (လူငယ်များ၏ခေတ်)ကို မြန်မာနိုင်ငံရှိ လူငယ်သတင်းသမားများကစက်တင်ဘာ ၁၃ ရက် တနင်္လာနေ့တွင် ပြုလုပ်ခဲ့သော ၎င်းတို့၏ ပဏာမအစည်းအ၀ေးအပြီးတွင် စတင် တည်ထောင်ခဲ့ကြသည်။​

ဖေဖော်၀ါရီလတစ်ရက် စစ်အာဏာသိမ်းမှုအလွန်တွင် ကြီးမားသည့်လိုအပ်ချက်ဖြစ်လာခဲ့သော သတင်းအချက်အလက် လိုအပ်ချက်ကွက်လက်ကိုဖြည့်ရန်နှင့် သတင်းအချက်အလက်များ ဖြန့်၀ေနိုင်သည့် ပလက်ဖောင်းတစ်ခုကိုပေးရန်ဆိုသည့် ရည်ရွက်ချက်ဖြင့် မတူကွဲပြားသည့် နောက်ခံအခြေအနေမျိုးစုံမှ သတင်းထောက်များသည် လူငယ့်ခေတ်ကိုတည်ထောင်ရန် လာရောက်စုစည်းကြခြင်းဖြစ်ပါသည်။ နိုင်ငံတော်စီမံအုပ်ချုပ်ရေးကောင်စီ ယခုအခြေအနေတွင် အိမ်စောင့်အစိုးရဟု အမည်ပြောင်းထားသည့် တပ်မတော်အနေဖြင့် ပြည်သူလူထုအပေါ် ကျူးလွန်သည့်အမှုများအနက် နိုင်ငံအဝှမ်းရှိ သတင်းအချက်အလက်စီးဆင်းမှုကို ပိတ်ဆို့တားဆီးပစ်ရန် လုပ်ဆောင်လာခြင်းများသည်လည်း တစ်ခုအပါအ၀င်ဖြစ်ပါသည်။​

ဖေဖော်၀ါရီလ ၈ ရက်နေ့တွင် ရုပ်မြင်သံကြားမှတစ်ဆင့် ထုတ်လွှင့်ခဲ့သော စစ်အာဏာ သိမ်းခေါင်းဆောင် ဗိုလ်ချုပ်မင်းအောင်လှိုင်၏မိန့်ခွန်းတွင်  ၎င်း၏ အာဏာလုယူမှုကို သန်းပေါင်းများစွာသောပြည်သူလူထုမှ ပြင်းပြင်းထန်ထန်ကန့်ကွက်ဆန့်ကျင်ခြင်းအပေါ်တွင် အတန်ငယ် စိတ်ရှုပ်ထွေး လက်မခံနိုင်သည့်ပုံ ပေါ်ပေါက်နေပါသည်။​ ထိုအချိန်မှစတင်၍ တပ်မတော်သည်  လူသတ်မှုများ၊ တရားဥပဒေမဲ့ ဖမ်ဆီးချုပ်နှောင်ခြင်းများနှင့် ပြည်သူလူထုနှင့် ငြိမ်းချမ်းစွာဆန္ဒထုတ်ဖော်သူများအား ညှင်းပန်းနှိပ်စက်၊တိုက်ခိုက်ခြင်းများ၊  စစ်အာဏာသိမ်းမှုကို ဆန့်ကျင့်သည့်ကိစ္စရပ်များအား ၀ေ၀ေဆာဆာ စုစည်းတင်ပြသည့် မီဒီယာအဖွဲ့အစည်းများမှစတင်၍ အခြားသော မီဒီယာအသင်းအဖွဲ့များအား ဖျက်သိမ်းပစ်ခြင်း၊များ အစရှိသည်တို့ကို ကျူးလွန်ခဲ့ပါသည်။ မီဒီယာရုံးခန်းများနှင့် အဆောက်အအုံများအား ၀င်ရောက်စီးနင်းရှာဖွေပြီး သတင်းထောက်များအား အဓမ္မပြန်ပေးဆွဲခြင်း၊ လူအများမြင်သာသည့် လမ်းမများပေါ်တွင်နှင့် အကျဥ်းထောင်များတွင် ညှင်းပန်းနှိပ်စက်ခြင်းများကိုလည် ကျူးလွန်ခဲ့ပါသည်။

Detained Journalists Information Group and Reporting ASEAN အဖွဲ့၏ ထုတ်ပြန်ချက်အရ ဖမ်းဆီးအကျဥ်းချခံရသည့် သတင်းထောက်ပေါင်း ၁၀၄ဦးခန့်ရှိပြီး အမေရိကန်နိုင်ငံသား Danny Fenster အပါအ၀င် သတင်းထောက် ၃၁ ဦးသည် ဆက်လက်၍ အကျဥ်းကျနေဆဲဖြစ်သည်။​ မီဒီယာအဖွဲ့အစည်း၄ဖွဲ့အနေဖြင့် ရာဇသတ်ကြီးပုဒ်မ ၅၀၅ (က)ဖြင့် တရားစွဲဆိုခြင်းခံထားရပြီး မီဒီယာအဖွဲ့အစည်း၇ဖွဲ့အနေဖြင့် ၎င်းတို့၏ ထုတ်ဝေခွင့်လိုင်စင်များ ပိတ်သိမ်းခြင်းခံခဲ့ရပါသည်။ အချို့သော မီဒီယာအဖွဲ့အစည်းများအနေဖြင့် ၎င်းတို့၏ ၀န်ထမ်းများအား တပ်မတော်၏ ထိန်းချုပ်မှုမှကင်းလွတ်သောနေရာများကို ပြောင်းရွှေ့နေရာချထားပြီး သတင်းလုပ်ငန်းများဆက်လက်လည်ပတ်နိုင်သော်လည်း 7 Day News Journal နှင့် The Voice Daily ကဲ့သို့သော သတင်းစာများအနေဖြင့် ၎င်းတို့၏ လုပ်ငန်းဆောင်တာများကို အပြီးသတ်ရပ်စဲပစ်ခဲ့ရသည်။ မတ်လ ၁၇ ရက်၊ ၂၀၂၁ ခုနှစ်မှစတင်၍ မြန်မာနိုင်ငံသည် သတင်းစာမရှိသောနိုင်ငံဖြစ်လာခဲ့သည်မှာ ခုနှစ်လကျော်ကြာမြင့်ခဲ့ပြီးဖြစ်ပြီး ထိုအချိန်မှစတင်၍ မြန်မာနိုင်ငံတွင် လွတ်လပ်၍အမှီအခိုကင်းသော ပုံနှိပ်သတင်းစာထုတ်၀ေခြင်းများ တစ်စောင်မှပင်မကျန်အောင် ဆိတ်သုဥ်းခဲ့ရသည်။​

ဖေဖော်၀ါရီတစ်ရက်နေ့မှစတင်သည့် တပ်မတော်၏ ပြည်သူလူထုအပေါ် အဆမတန်ဆိုးရွားစွာ ညှင်းပန်းနှိပ်စက်ခြင်းနှင့် ဖိနှိပ်ခြင်းများ ပိုမိုမြင့်တက်လာသည့်နှင့်တစ်ပြိုင်နက် ပြည်သူလူထု၏ သတင်းအချက်အလက်ရရှိပိုင်ခွင့်များ လျေ့ာကျလာခဲ့ရသည်။ ပထမပိုင်းတွင် တစ်နိုင်ငံလုံး အင်တာနက်ပိတ်ဆို့ဖြတ်တောက်ခြင်းများ ပြုလုပ်ခဲ့ပြီးနောက်တွင် တပ်မတော်အနေဖြင့် မြို့နယ်အလိုက် အင်တာနက်ဖြတ်တောက်ခြင်းများ ဆက်လက်ပြုလုပ်ခဲ့ပြီး ယခုလတွင်ပင် အင်တာနက်ဖြတ်တောက်ခံရသော မြို့နယ်၂၅ မြို့နယ် ကျန်ရှိနေပါသေးသည်။ တပ်မတော်၏ အဆိုးယုတ်ဆုံး၊ အရက်စက်ဆုံးလုပ်ရပ်များမှ အချို့ဖြစ်သည့် ရာဇ၀တ်မှုများဖြစ်ကြသည့် ကျေးလက်ဒေသများရှိလူများအား အစုလိုက်အပြုံလိုက်သတ်ဖြတ်ခြင်းများသည် အင်တာနက်ဖြတ်တောက်ခံကြရသည့်ကာလများတွင် ကျူးလွန်ခဲ့ကြခြင်းဖြစ်သည်။​

သတင်းအချက်အလက်ရယူမှုအတွက် စိန်ခေါ်မှုအခက်အခဲများရှိလာသည့်အခါ သတင်းများအား ဝါဒဖြန့်ရန်ပုံဖျက်ခြင်း၊ သတင်းအတုများ၊ သတင်းအမှားများ များပြားလာခြင်းနှင့် လွဲမှားသည့်သတင်းများအား ပိုမိုမြင်တွေ့လာကြရပါသည်။ ယခုကဲ့သို့ အရေးအခင်းဖြစ်နေသည့် ကာလများတွင် မှန်ကန်သည့်၊ဘက်မလိုက်သည့် သတင်းအချက်အလက်များရရှိနိုင်မှုသည် အရေးအကြီးဆုံး လိုအပ်ချက်တစ်ခုဖြစ်ပါသည်​။ အန္တရာယ်များကြားမှ သတင်းရယူနေရသည့် ပတ်၀န်းကျင်တွင် မီဒီယာအဖွဲ့အစည်းများအနေဖြင့် တာ၀န်သိပြည်သူလူထုမှ ပြန်လည်သတင်းပေးပို့သည့် citizen journalists များအပေါ် ပိုမိုမှီခိုလာကြရပါသည်။ ထိုသို့ရဲရင့်၍ တာ၀န်သိသော ပြည်သူလူထုမှ မြေပြင်တွင် သတင်းရယူရသည့်အခါ ရိုက်နှက်ခံကြရခြင်း၊ အရေးကြီးအဖြစ်အပျက်များအား မှတ်တမ်းတင်ရိုက်ကူးကြရသည့်အခါတွင် လုံခြုံရေးတပ်ဖွဲ့၀င်များ၏ ဖမ်းဆီးအရေးယူခြင်းများကို ခံရနိုင်ခြေရှိသည့် စိန်ခေါ်မှုများကြားမှ​ သတင်းရယူ၊ပေးပို့လာသော သတင်းရစ်မြစ်များအား စစ်မှန်မှုရှိ၊မရှိ စစ်ဆေးရသည့် လုပ်ငန်းစဥ်သည် မီဒီယာအဖွဲ့အစည်းများအတွက် ကြီးမားသည့် စိန်ခေါ်မှုတစ်ရပ်ဖြစ်နေပါသည်။

တပြိုင်နက်တည်းမှာပင် လူငယ်သတင်းထောက်များအနေဖြင့် အလုပ်တာ၀န်များမှ ရပ်စဲခံကြရခြင်း၊ အချို့မှာ ရှောင်တိမ်းပုန်းအောင်းနေကြရခြင်းများကြောင့် ၀င်ငွေမရရှိခြင်းနှင့် အချို့မှာ အကြမ်းမဖက်အာဏာဖီဆန်မှုလုပ်ငန်းစဥ် Civil Disobedience Movement (CDM) များမှ ထောက်ပံ့သည့်ငွေကြေးများနှင့် ရပ်တည်နေကြရသည့် အခက်အခဲများကို ကြုံတွေ့နေကြရပါသည်။ တက်ကြွလှုပ်ရှားသူများမှ “သတင်းထောက်လှမ်း၊ဖော်ထုတ်မှုသည် ရာဇ၀တ်မှုမဟုတ်ပါ” ဟု ကျယ်လောင်စွာပြောဆိုနေကြသော်လည်း စစ်အုပ်ချုပ်ရေးအောက်တွင်မူ သတင်းထောက်များအား ရာဇ၀တ်သားများသဖွယ်ဆက်ဆံနေကြပါသည်။  မိမိတို့၏ သတင်းထောက်တစ်ဦးဖြစ်သော ကို၀ိုင်(အမည်လွှဲ) မှ ၎င်း၏ အကြောင်းကို ယခုကဲ့သို့ပင် ပြောပြထားပါသည်။

ကို၀ိုင်သည် ယခုနှစ်အစောပိုင်းတွင် ရန်ကုန်မြို့တွင်း လူထုဆန္ဒပြမှုများကို သတင်းရ ယူနေသည့်ကာလတွင် ဖမ်းဆီးခံခဲ့ရခြင်းဖြစ်သည်။ သူသည် အင်းစိန်ထောင်တွင် ၃လကြာ ချုပ်နှောင်ခံခဲ့ရသည်။ ပြန်လည်လွတ်မြောက်လာသည့်အခါတွင် သူအလုပ်လုပ်ကိုင်ခဲ့သည့် မီဒီယာအဖွဲ့အစည်းသည် ထုတ်၀ေခွင့်လိုင်စင်ဖျက်သိမ်းခံလိုက်ရသည့်အတွက် သူ့အနေဖြင့် အလုပ်လက်မဲ့ဖြစ်သွားခဲ့ရသည်။​

“ကျွန်တော် မတ်လထဲ ထောင်ထဲရောက်နေတုန်းက ကျွန်တော့်သတင်းဌာန လိုင်စင်ပိတ်သိမ်းခံလိုက်ရတဲ့သတင်းကြားတယ်၊ သတင်းတွေမထုတ်တော့ဘူးလို့ ကြားလိုက်တော့ ကျွန်တော် တကယ်ပဲ ကူရာကယ်ရာမဲ့ဖြစ်ရပါတယ်။ ကျွန်တော့်အတွက်ကတော့ အလုပ်ပြုတ်ရုံတင်မကဘူး၊ ကျွန်တော်တို့နိုင်ငံအတွက်လည်း သတင်းလွတ်လပ်ခွင့်ဆုံးရှုံးသွားတာပါပဲ” ဟု ပြောဆိုခဲ့ပါသည်။

သို့သော်ငြားလည်း ကို၀ိုင်အနေဖြင့် စစ်အုပ်ချုပ်မှုအောက်တွင်ပင် သတင်းရယူ တင်ဆက်ခြင်းလုပ်ငန်းများအား ဆက်လက်လုပ်ကိုင်ရန် စိတ်အားထက်သန်လျက်ရှိပြီး လူငယ်ခေတ်အဖွဲ့တွင် စတင်ပါ၀င်ပြီးသည့်အချိန်မှစ၍ ရှောင်တိမ်း၊ပုန်းအောင်နေလျက်ရှိပါသည်။ လူငယ်ခေတ်၏ သတင်းထုတ်လုပ်ဖြန့်ချီရေး အဖွဲ့၀င်တစ်ဦးဖြစ်သည့်အတွက် သူ့အနေဖြင့် အခြားသော အဖွဲ့၀င်များနှင့် မြန်မာနိုင်ငံရှိ ထောင်နှင့်ချီသော citizen journalists များနှင့်အတူ အန္တရာယ်နှင့်စိန်ခေါ်မှုများကို ရင်ဆိုင်နေရလျက်ရှိပါသည်။ ကို၀ိုင်မှ “ကျွန်တော်ကတော့ နိုင်ငံမှာဖြစ်ပေါ်နေတဲ့ ပဋိပက္ခတွေကို မှတ်တမ်းတင်၊​ အစီရင်ခံနိုင်နေတဲ့ အလုပ်ကို ဆက်လက်လုပ်ခွင့်ရနေတာကို ၀မ်းသာပါတယ်၊​ လိုအပ်တဲ့လူတွေဆီကို မှန်ကန်တိကျတဲ့ သတင်းတွေရောက်အောင် ကျွန်တော့်အနေနဲ့ တင်ဆက်ခွင့်ရနေတဲ့အတွက် ကိုယ့်ကိုယ်ကိုလည်း ယုံကြည်မှု တိုးပွားစေပါတယ်” ဟု ပြောဆိုခဲ့ပါသည်။

လူငယ်ခေတ်သည် စံနှုန်းအမြင့်မားဆုံးသော သတင်းအချက်အလက်များကို ပြည်သူလူထုအနေဖြင့် ပိုမိုလွယ်ကူစွာရရှိနိုင်ရန်နှင့် ပြည်သူလူထု၏ သတင်းအချက်အလက်ရယူပိုင်ခွင့် အခွင့်အရေးအတွက် မှန်ကန်တိကျသည့် သတင်းအချက်အလက်များကို ရှာဖွေဖော်ထုတ်ပေးရန် စိတ်အားထက်သန်မှုနှင့် စွမ်းဆောင်ရည်ပြည့်၀ကြသည့် သတင်းထောက်များကြား ပေါင်းကူးတံတားအဖြစ်ဆက်သွယ်ပေးရန် ရည်ရွယ်ချက်ဖြင့် တည်ထောင်ထားခြင်းဖြစ်ပါသည်။ ၎င်းရည်ရွယ်ချက်၏ တစိတ်တပိုင်းအား အကောင် အထည်ဖော်ရန်အတွက် လူငယ်ခေတ်အနေဖြင့် မြန်မာနိုင်ငံတွင်းရှိ လူငယ်ျိုးဆက်များအား ပစ်မှတ်ထား၍ ၎င်းတို့အတွက် အသုံး ၀င်မည့် သတင်းအချက်အလက်များကို ထောက်ပံ့ပေးရန်လည်း ကြိုးပမ်းလျက်ရှိပါသည်။ လူငယ်ခေတ်၏ အဖွဲ့၀င်အများစုသည် ၂၀၁၀မှ ၂၀၂၀ ခုနှစ်မတိုင်မီကာလများရှိ စစ်အုပ်ချုပ်မှုအောက်တွင် ၎င်းတို့၏ ကလေးဘ၀နှင့် လူငယ်ဘ၀ကို နေထိုင်ဖြတ် သန်းခဲ့ကြရသူများဖြစ်ကြသည်။ သို့သော်လည်း လူငယ်ခေတ်အဖွဲ့၀င်များအနေဖြင့် အပြောင်းအလဲများဖြစ်ခဲ့သော ထိုဆယ်စုနှစ်ကာလတွင် ရရှိခဲ့သည့် အခွင့်အလမ်းများကိုလည်း ရရှိခံစားခဲ့ကြရသည့်အတွက် ယနေ့ခေတ် မြန်မာလူငယ်များကြုံတွေ့နေကြရသော စိုးရိမ်ပူပန်မှုများကို နားလည်နိုင်စွမ်းရှိကြခြင်းဖြစ်ပါသည်။

“ကျွန်မရဲ့ ကလေးသူငယ်ဘ၀မှာ စစ်တပ်ရဲ့ ၀ါဒဖြန့်မှုတွေအပြည့်ပဲ။ အင်မတန်ရှက်ဖို့ကောင်းတာက ကျွန်မ အဲ့ဒါတွေကို ယုံခဲ့တယ်။ ကျွန်မ အသက်ငယ်ငယ်ရွယ်ရွယ်မှာ အလုပ်ရှာဖို့၊ တခြားအခွင့်အလမ်းတွေရှာဖို့ အရမ်းခက်ခဲခဲ့တယ်။ သတင်းအချက်အလက်ရယူပိုင်ခွင့်ဆိုတာ အခြေခံလူ့အခွင့်အရေးဖြစ်တဲ့အတွက် ဒီနေ့ခေတ်လူငယ်တွေကို ကျွန်မတို့တုန်းကလို သတင်းအချက်အလက်မရရှိတဲ့အတွက် အခက်အခဲတွေ ကြုံတွေ့ရတာမျိုး မဖြစ်စေချင်ပါဘူး။”

လူငယ်ခေတ်သည် လူငယ်များ၏ ပြောရေးဆိုခွင့်နှင့် အသံများကို ထုတ်ဖော်ပြောဆိုနိုင်ရန်အတွက် ကူညီထောက်ပံ့ပေးရန်နှင့် ပတ်၀န်းကျင်တစ်ခုအား ဖန်တီးပေးနိုင်ရန်ဖြစ်သည်။​ လူငယ်ခေတ်အနေဖြင့် ပဏာမအဆင့်တွင် အွန်လိုင်းအစီအစဥ်တစ်ခုအား တင်ဆက်ရန် ကြိုးပမ်းနေပြီး ၎င်းအစီအစဥ်တွင် လူငယ်များအနေဖြင့် ၎င်းတို့၏ အတွေ့အကြုံများ၊ စိုးရိမ်ပူပန်မှုများနှင့် အမြင်များကို ဖော်ထုတ်နိုင်မည်ဖြစ်ပါသည်။ ထိုအစီအစဥ်တွင် နိုင်ငံနှင့်အ၀ှမ်းမှလူငယ် မည်သူမဆို ပါ၀င်နိုင်မည်ဖြစ်ပြီး အသေးစိတ်အချက်အလက်များအား မကြာခင်ထုတ်ပြန်သွားမည်ဖြစ်ပါသည်။

လူငယ်ခေတ်၏ အခြားရည်မှန်းချက်တစ်ခုမှာ သတင်းထောက်များအတွက် အခွင့်အလမ်း များဖန်တီးပေးနိုင်ရန်နှင့် ပြိုလဲလုနီးပါးဖြစ်နေသော မြန်မာ့မီဒီယာလောကအား ပြန်လည်ရှင်သန်ရန် တည်ဆောက်လိုခြင်းဖြစ်ပါသည်။​ လူငယ်ခေတ်အနေဖြင့် တပ်မတော်ကြောင့် အလုပ်လက်မဲ့ ဖြစ်ကြရသော သတင်းသမားအားလုံးအား အလုပ်အကိုင်အခွင့်အလမ်းဖန်တီးပေးနိုင်ရန် မတတ်သာသော်လည်း ယခုကဲ့သို့ ကြောက်မက်ထိတ်လန့်ဖွယ်ရာ ကာလအတွင်းမှာပင် ၎င်းတို့၏ အသက်မွေး၀မ်းကြောင်းအလုပ်ကို ဆက်လက်လုပ်ကိုင်လိုသော၊ စိတ်အားတက်ကြွမှုရှိသော သတင်းထောက်များအတွက် အခွင့်အလမ်းများဖန်တီးပေးနိုင်မည်ဟု ယုံကြည်ပါသည်။ ယခုကာလတွင်းမူ သတင်းထုတ်၀ေ၊ တင်ဆက်ခြင်းလုပ်ငန်းများအား သတင်းထောက်ခုနှစ်ဦး၊ တည်းဖြတ်သူသုံးဦး၊ ဗီဒီယိုတည်းဖြတ်သူတစ်ဦးနှင့် ဘာသာပြန်တစ်ဦးတို့ အတူတကွပူးပေါင်း၍ လုပ်ကိုင်ဆောင်ရွက်လျက်ရှိနေပါသည်။

လူငယ်ခေတ်၏ Facebookစာမျက်နှာအား ၀င်ရောက်လေ့လာပြီး like and follow ပြုလုပ်ထားခြင်းဖြင့် ဤအဖွဲ့အစည်း၏ သတင်းအချက်အလက်များနှင့် လုပ်ငန်းဆောင်တာများအား ဆက်လက်သိရှိနိုင်မည်ဖြစ်ပါသည်။ မိမိတို့အနေဖြင့် website တစ်ခုနှင့် လုံခြုံစိတ်ချရသည့် အခြားသော မီဒီယာလမ်းကြောင်းများမှတဆင့် မြန်မာပြည်သူလူထုထံသို့ ရောက်ရှိရန်လည်း ကြိုးပမ်းလျက်ရှိပါသည်။ သို့ရာတွင် Facebook သည် သတင်းအချက်အလက်ဖြန့်၀ေရာတွင် မိမိတို့၏ ပင်မ၀န်ဆောင်မှုအဖြစ် တည်ရှိနေမည်ဖြစ်ပါသည်။